Գորիսի հոգևոր հովիվը սխալ է մեկնաբանել Տեղի ճանապարհին պատահած միջադեպը

Դեկտեմբերի 23-ին Քաջարանի քաղաքապետին սատարելու համար Քննչական կոմիտե եկած Գորիսի հոգևոր հովիվ Ահարոն քահանա Մելքումյանը հայտարարել էր, որ Տեղ գյուղի ճանապարհին ադրբեջանցիները կրակել են հայկական մեքենայի վրա։

«Մի քանի օր առաջ՝ երեկոյան 9-10-ին, Խնձորեսկ-Տեղ գյուղ ճանապարհահատված է իջել թուրքը: Մեր ճանապարհին կանգնած է եղել, մեքենա է անցել, կանգնացրել է: Բնականաբար չեն կանգնել: Այդ մեքենայի հետևից կրակել է: Հիմա անվտանգության երաշխիք ունե՞նք»,- հայտարարել էր քահանան՝ նշելով, որ միջադեպի մասին իրեն պատմել է Տեղի համայնքապետը։

«Փաստերի ստուգման հարթակը» կապ հաստատեց Տեղի համայնքապետ Ներսես Շադունցի հետ՝ ճշտելու միջադեպի մանրամասները։ 

Համայնքապետը մեզ հետ զրույցում նշեց, որ քահանան, հավանաբար, սխալ է հասկացել և մեկնաբանել տեղի ունեցածը։ «Դա եղել է մի 15 օր առաջ, առաջացել էին ճանապարհի ուղղությամբ, մեքենան իրոք կանգնացրել են, չեմ կարող ասել՝ երևի ինչ-որ բան են ուզել, ծխախոտ են ուզել կամ կրակ, բայց չի կանգնել»,- հայտնեց Շադունցը։

Ըստ համայնքապետի՝ դրանից հետո լսվել է կրակոցի ձայն, սակայն այդ անձիք չեն կրակել, ձայնը եկել է հեռվից: «Հնարավոր է՝ նույնիսկ հայկական դիրքերից կրակն արձակված լինի, բայց մեքենայի ուղղությամբ չի եղել»,- պարզաբանեց համայնքապետը։

Այսինքն՝ ադրբեջանական զորքն իսկապես եղել է Տեղ գյուղի ճանապարհին, սակայն հայկական համարանիշով մեքենայի ուղղությամբ կրակ չի արձակվել։ Հիշեցնենք, որ Սյունիքի մարզի սահմանագծման աշխատանքները և դրանց շուրջ բանակցությունները դեռևս շարունակվում են։ 

Անի Ավետիսյան