Ադրբեջանի դատախազությունը բացահայտում է Ադրբեջանի քարոզչամեքենայի սուտը

Ադրբեջանի պետական քարոզչամեքենան հաճախ ինքն է խճճվում իր տարածած կեղծ տեղեկությունների ու ստերի մեջ՝ հակասելով ինքն իրեն։ 

Հոկտեմբերի 27-ին ադրբեջանական լրատվամիջոցները հայտնեցին, որ Ադրբեջանի զինված ուժերին հաջողվել է սպանել Արցախի Հանրապետության պաշտպանության նախարար — Պաշտպանության բանակի հրամանատար Ջալալ Հարությունյանին։

Ադրբեջանական իշխանամերձ haqqin.az կայքը նույնիսկ տեսանյութ էր հրապարակել՝ պնդելով, որ դրանում երևում է Հարությունյանին «լիկվիդացնելու» օպերացիան։ Տեսանյութի վերլուծությունից պարզ է դառնում, որ լրատվամիջոցն այն ստացել էր Ադրբեջանի պաշտպանության նախարարությունից։

Հոկտեմբերի 30-ին Ադրբեջանի գլխավոր դատախազությունը հայտարարություն էր տարածել՝ հայտնելով, որ Գյանջայում խաղաղ բնակչության դեմ գործած հանցագործությունների համար միջազգային հետախուզում է հայտարարվել Արայիկ Հարությունյանի, Դավիթ Բաբայանի, Ջալալ Հարությունյանի և Արման Բաբաջանյանի նկատմամբ։

Եվ այստեղ հարց է ծագում՝ ինչպե՞ս է Ադրբեջանը հետախուզում հայտարարում մի անձի նկատմամբ, որն իրենց իսկ պնդմամբ «լիկվիդացվել է»։ 

Հիշեցնենք, որ Արցախի նախագահ Արայիկ Հարությունյանը հոկտեմբերի 27-ին  հայտնել էր, որ Ջալալ Հարությունյանը մարտական դիրքում վիրավորում է ստացել։ Որոշում էր ընդունվել նրան ՊԲ նախարարի պաշտոնում փոխարինել Միքայել Արզումանյանով։ Ավելի ուշ Արցախից հայտնել էին, որ Հարությունյանի կյանքին վտանգ չի սպառնում և ստացած վիրավորումը ծանր չէ։ 

Անի Գրիգորյան

[easy-social-share buttons="facebook,twitter,vk,telegram" counters=1 style="icon" point_type="simple"]